Newyddion

Cynnwys Newyddion

Esgyn i fyny yng Ngorsaf Rheilffordd Aberdyfi! 26/11/2008

Yn dilyn ymgyrch hir i leihau uchder camu rhwng y platfform a'r trenau yng ngorsaf rheilffordd Aberdyfi mae Llywodraeth Cynulliad Cymru (LLCC) wedi cadarnhau ei fod yn mynd i ddarparu cyllid i ateb y broblem mewn modd arloesol.

Ni fu ceisiadau blaenorol am gyllid yn llwyddiannus oherwydd ratio buddsoddiad i fudd isel pan yn cymharu maint y buddsoddiad o ran codi'r holl platfform gyda defnydd amcanol o'r orsaf.

Er hyn mae LLCC wedi adnabod dull newydd o ateb y broblem drwy godi darn o'r platfform i gyfuno â drysau'r trenau pan fyddant yn galw yn yr orsaf.

Yn ystod ei ddatganiad ar y mater medd Ieuan Wyn Jones AC, Dirprwy Brif Weinidog Cymru a'r Gweinidog dros yr Economi a Thrafnidiaeth, "Ymwelais â'r orsaf yn ystod mis Mai eleni ac roedd y broblem o'r pellter camu o'r platfform i'r trên yn amlwg iawn.

"Bydd y cynllun peilot yma yn lleihau'r pellter camu gydag adeiladwaith arbennig heb yr angen am ail adeiladu'r holl platfform a fydd yn sicrhau bod y trenau sy'n aros yn yr orsaf yma yn hygyrch i bawb."

Mae sawl corff ac unigolyn lleol gan gynnwys Cyngor Cymuned Aberdyfi, Cynhadledd Cyswllt Lein Yr Arfordir a grwpiau Hygyrchedd yn ogystal â Phartneriaeth Rheilffordd y Cambrian (PRC) wedi ymgyrchu dros nifer o flynyddoed i gael ateb i broblemau hygyrchedd yn Aberdyfi.

Mae PRC wedi gweithio gyda'r cyfryngau lleol ers cyhoeddi datganiad i'r wasg ar y mater yn 2006 i godi ymwybyddiaeth o'r broblem ac i annog eraill i ymrywmo yn y broses ymgyrchu.

Ar ran PRC dywedodd Gerwyn Jones, "Mae hyn yn newyddion gwych i bawb sy'n defnyddio'r orsaf, neu yn flaenorol wedi methu a'i ddefnyddio oherwydd yr uchder camu. Bydd ystod eang o ddefnyddwyr yn cael budd o hyn gan gynnwys y methedig, teuluoedd â phramiau yn ogystal â'r golffwyr sy'n defnyddio'r trenau i fynychu'r cwrs golff cyfagos!

"Mae'r £30,000 sydd wedi ei neilltuo gan LLCC i wireddu'r prosiect yma yn esiampl bositif arall o'r buddsoddiad sy'n mynd ymlaen ar rwydwaith y Cambrian."

Am ragor o wybodaeth, cysylltwch a ni drwy ddefnyddio'r ffurflen Adborth neu drwy'r manylion cyswllt ar y chwit.